الست تَوَكُّل
***
كلمات
صبري الصبري
***
الست توكل كريمان
قاعدة لنا بتمضغ في لبانْ
وبتوزن مصر المحروسة
بميزان الغش التعبانْ
بتوقف لينا ضفايرها
وضوافرها مليانه سبانْ
من الهرش في راسها ... مسكينة !
هايجلها من مصر جِنَانْ !!
***
الست توكل عامله لنا
هيصه المتعوسة المنحوسةْ
نوبل خلاها مشهورة
مذعورة .. عامية .. موكوسةْ
بتهاجم مصر وبتهددْ
البت المفعوصة السوسةْ
يا توكل : مصر المحروسةْ
ماشية بالخطة المدروسةْ !
***
الست توكل .. محتارةْ
عاملة لنا بـ( تويتر ) غارةْ
بالفيس بتفيس تلاكيكها
وبتحسب كدبتها شطارةْ
وتشيَّر احقادها بقسوة
عن مصر الغالية ... يا خسارة !
نوبل حط لها أوهامه
عبَّى لها الجايزة في شكارةْ !
***
الست توكل مش عارفه
إن المحروسة في قلوبنا
والكل بيشهد لبلادنا
مش ممكن حد يكدبنا
قاعدة بتشكك وتشبك
صوابعها مش راضية تسيبنا
ناقص تتهور وتجيلنا
في بلادنا الحلوة تهددنا !
***
الست توكل مش فاضيه
إلا للحرب الأهلية
بتأجج نارها وبتنفخ
فيها إن كانت مطفيه
وبتحسب مصر وسكانها
في الفرن اللحمة المشويه
يا توكل إحنا تعبينك ؟
لمي تعابينك يا وليه !
***
ياست توكل فضينا
من سيرتك ... إحنا بنحبك :
يا مصر المحروسة قلوبنا
من شوقها مشتاقة لقلبك
بتحن لأرضك في الغربة
برخائك أو ضيقة كربك
بنواجه من شتمك فورا
أو مسِّك بكلام أو سبك !
***
الست توكل مش طايقه
تسمع عن جيشنا العملاقْ
بتقول (العسكر) حاكمينا
بتلخبط كل الأوراقْ
و(العسكر) دولم أبطالنا
في القلب الصافي المشتاقْ
خير الأجناد الله يحفظ
جيشك يا مصر الأخلاقْ
***
الست توكل منغاظه
من شعب المحروسه الواعي
بيحقق أهدافة بهمه
بيلبي بالعزم الداعي
لحبيبة قلبه ام الدنيا
مصر المحفوفه بدواعي
بتخلي عيونه سهرانه
والصبح بيسعى بمساعي !
***
الست توكل بتدهور
في الحالة الذهنيه .... كلامْ
بيدحرج مساوئها علينا
بسخافة وفوضى وأوهامْ
بتفكر إنّ المحروسه
محتاجة فكر الأقزامْ
من فضلك .... سيبنا في حالنا
وكفاية دوشة يا مدامْ !
***
الست توكل شَغْلانا
عامله لنا الحاقده شُغْلانه
بتغاغي رايحا لنا وجايا
شايله لنا ضغائن مليانه
وبتكتب كتابتها البايخه
الحاسده الدايخه التعبانه
وبتضحك زي ما بتعيط
وتزيط زيطتها ... جبانه !
***
الست توكل مفروسه
من ثورة مصر الجبارهْ
في يونيو ثلاثينها الزاهي
أزهارها طلعت بنضارهْ
واستلمت هيه وأصحابها
ثمن الأفكار المنهارهْ
وافتكروا مصر في قبضتهم
ببطاقة تصويت دوَّارهْ !
***
الست توكل بتوكِّل
في الأمم المتحده محامي
بيتابع نوبل وسنينه
مبعوثها الكتوت النامي
ما هي حرقت في بلادها أماكن
واستلمت جايزتها أمامي
وافتكرت إن فخامتها
في مصر المندوب السامي !
***
الست توكل مطروده
من مصر ورجعت بهوانْ
ما نتيش دخلاها ... دي بلادنا
وبلاد العرب الشجعانْ
دي بتشم مصر وعاوزانا
ندخلها بلادنا بأمانْ
مسكينة .. موهومه ... خايبه
الست توكل كريمانْ !
ليست هناك تعليقات:
إرسال تعليق